Diocesan News

``ತುಮಿ ತುಮ್ಚೊ ಶೆವೊಟ್ ಠರಾಯಾ. ಆನಿ ತುಮ್ಚಿಂ ಸರ್ವ್ ಕಾಮಾಂ ತ್ಯಾ ಶೆವೊಟಾಕ್ ಪೂರಕ್ ಜಾವ್ನ್ ಆಸುಂ. ಬರೊಂವ್ಚೆ ಪಯ್ಲೆಂ ವಾಚ್ಚೆ ಗರ್ಜೆಚೆಂ. ವಾಚಾಪ್ ಎಕಾ ಬರವ್ಪ್ಯಾಕ್ ಚಡಿತ್ ಘಟಾಯ್ ದಿತಾ. ಹ್ಯಾ ಸಾಹಿತ್ಯ್ ಶಿಬಿರಾಚ್ಯಾ ಬುನ್ಯಾದಿನಿಮ್ತಿಂ ವ್ಹಡ್ ಸಾಹಿತಿ ತುಮ್ಚೆಥಾವ್ನ್ ಉಬ್ಜೊಂದಿ.?? ಮ್ಹಣ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪ್ರಶಸ್ತಿ ಜಿಕ್ಪಿ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣೆಂ ಸಾಂಗ್ಲೆಂ. ತೊ ಐಸಿವೈಎಮ್ ಕೇಂದ್ರೀಯ್ ಸಮಿತಿ ಆನಿ ಆಮ್ಚೊ ಯುವಕ್ ಪತ್ರಾಂಚ್ಯಾ ಜೋಡ್ ಆಸ್ರ್ಯಾಖಾಲ್ ಮಾಂಡುನ್ ಹಾಡ್‌ಲ್ಲ್ಯಾ `ಯುವ ಸ್ಪಂದನ್' ಸಾಹಿತಿಕ್ ವಸ್ತೆ ಶಿಬಿರಾಚ್ಯಾ ಸಂಪ್ಣೆ ಕಾರ್ಯಾಂತ್ ಮುಖೆಲ್ ಸಯ್ರೊ ಜಾವ್ನ್ ಉಲಯ್ತಾಲೊ.

ಮಂಗ್ಳುರ್ ದಿಯೆಸೆಜಿಂತ್ಲ್ಯಾ ಯುವ ಬರೊವ್ಪ್ಯಾಂಕ್ ಉತ್ತೇಜನ್ ದಿಂವ್ಚ್ಯಾ ಇರಾದ್ಯಾನ್, ಆಗಸ್ಟ್ 31 ಆನಿ ಸಪ್ಟೆಂಬ್ರ್ 1 ವೆರ್, ಯುವ ದಫ್ತರ್, ಒಲಿವೆತ್ ಘರಾಂತ್ ಮಾಂಡುನ್ ಹಾಡ್‌ಲ್ಲೆಂ ಕೊಂಕ್ಣಿ ಕಾಮಾಸಾಳ್ 48 ಯುವಜಣಾಂಚ್ಯಾ ಹಾಜ್ರೆಂತ್ ಯಶಸ್ವಿ ರಿತಿನ್ ಆಕೇರ್ ಜಾಲೆಂ.

ಸಂಪ್ಣೆ ಕಾರ್ಯಾಂತ್ ಶಿಬಿರಾರ್ಥಿಂಕ್ ಪ್ರಮಾಣ್ ಪತ್ರ್ ಹಾತಾಂತರ್ ಕೆಲಿಂ. ಉಪಾಧ್ಯಕ್ಷ್ ಜೊಶ್ವಾ ಡಿಸೊಜಾನ್ ಯೆವ್ಕಾರ್ ಮಾಗುನ್ ಅಧ್ಯಕ್ಷ್ ಶೆಲ್ಡನ್ ಕ್ರಾಸ್ತಾನ್ ವಂದಿಲೆಂ. ವಿಲ್ಸನ್ ಕ್ರಾಸ್ತಾನ್ ಕಾರ್ಯೆಂ ಚಲಯ್ಲೆಂ.

ಹ್ಯಾ ಶಿಬಿರಾಚೆಂ ಉಗ್ತಾವಣ್ ಕಾರ್ಯೆಂ ಆಗಸ್ಟ್ 31 ವೆರ್ ಸಾಂಜೆರ್ 5 ವರಾರ್ ಮಾಂಡುನ್ ಹಾಡ್‌ಲ್ಲೆಂ. ಕವಿ ಆಂಡ್ರೂ ಎಲ್ ಡಿಕುನ್ಹಾನ್ ಆಪ್ಲೆಂ ಕವನ್ `ಆಬಾಚೆಂ ಘರ್? ವಾಚ್ಚೆಂ ದ್ವಾರಿಂ ಶಿಬಿರಾಚೆಂ ಉಗ್ತಾವಣ್ ಕೆಲೆಂ. ಹ್ಯಾ ಕಾರ್ಯಾಕ್ ಐಸಿವೈಎಮ್ ಚೊ ಆದ್ಲೊ ಅಧ್ಯಕ್ಷ್ ಶ್ರೀ ರೋಶನ್ ಮಾಡ್ತಾ, ದಿರೆಕ್ತೊರ್ ಬಾಪ್ ರೊನಾಲ್ಡ್ ಡಿಸೊಜಾ, ಶಿಬಿರಾಚೊ ಸಂಯೋಜಕ್ ವಿತೊರಿ ಕಾರ್ಕಳ್, ಅಧ್ಯಕ್ಷ್ ಶೆಲ್ಡನ್ ಕ್ರಾಸ್ತಾ, ಕಾರ್ಯದರ್ಶಿ ಆಶ್ವಿನಿ ಡಿಸೊಜಾ ಹಾಜರ್ ಆಸ್‌ಲ್ಲಿಂ. 

ಉಪ್ರಾಂತ್ ಕಲಾಕುಲ್ ಪಂಗ್ಡಾಥಾವ್ನ್ `ಕೊಂಕ್ಣಿ ಆಮ್ಚೊ ಫುಡಾರ್? ತಶೆಂ ಐಸಿವೈಎಮ್ ಬಂಟ್ವಾಳ್ ಘಟಕಾ ಥಾವ್ನ್ ಮಾದಕ್ ದೃವ್ಯಾಂಚ್ಯಾ ದುಷ್ಪರಿಣಾಮಾವಿಶಿಂ ವಾಟೆ-ನಾಟಕ್ ಸಾದರ್ ಜಾಲೆ. ಸಂಯೋಜಕ್ ವಿತೊರಿ ಕಾರ್ಕಳಾನ್ ಸಾಹಿತ್ಯಾಚಿ ಮುಳಾವಿ ಮಾಹೆತ್ ದಿಲಿ ತರ್, ರಾಕ್ಣೊ ಸಹ ಸಂಪಾದಕ್ ಟೊನಿ ಫೆರೊಸಾನ್ ಸಾಹಿತ್ಯ್ ವಾಚ್ಚ್ಯಾ ರಿತಿವಿಶಿಂ ಜಾಣ್ವಾಯ್ ದಿಲಿ.

ದುಸ್ರೆ ದಿಸಾ ಮಾ. ಮೆಲ್ವಿನ್ ಪಿಂಟೊನ್ ಲೇಖನಾವಿಶಿಂ ಮಾಹೆತ್ ಆನಿ ವರ್ದ್ಯೊ ತಯಾರ್ ಕರ್‍ಚೆವಿಶಿಂ ಪರಿಣಾಮ್‌ಕಾರಿ ರಿತಿನ್ ಪಂಗಡ್ ಚರ್ಚಾ ಚಲವ್ನ್ ವೆಲಿ.

ದನ್ಪರಾಂ ವಿಲ್ಮಾ ಬಂಟ್ವಾಳಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ಯುವ ಕವಿಗೋಷ್ಟಿ ಚಲ್ಲಿ. ವಿಲ್ಸನ್ ಕ್ರಾಸ್ತಾ, ಬ್ರ. ಜೊವಿನ್ ಸಿಕ್ವೆರಾ, ಪವಿಂತಾ ಮೊಂತೆರೊ, ಬ್ರ. ಜೊಯೆಲ್ ಪಿಂಟೊ, ಬ್ರ. ಲ್ಯಾನ್ಸನ್ ಪಿಂಟೊ, ಸಂದೀಪ್ ಮೊಂತೆರೊ, ಪ್ರೀತಿ ಜೂಲಿಯೆಟ್ ಪಿಂಟೊ, ಡ್ಯಾರೆಲ್ ಡಿಸೊಜಾ ವಾಮಂಜೂರ್, ಆಲ್ವಿನ್ ಆಗ್ರಾರ್ ಆನಿ ಗ್ರೆವಿಟಾ ದಾಂತಿ ಹಾಣಿಂ ಆಪಾಪ್ಲಿ ಕವಿತಾ ವಾಚ್ಲಿ.