ಹಾಂವ್ ಹಾಸ್ತಾಂ, ತಿಚ್ಯಾ ತೊಂಡಾರ್ ಹಾಸೊ ಉಮಾಳ್ತಾತ್
ಹಾಂವ್ ರಡ್ತಾಂ, ತಿಚ್ಯಾ ದೊಳ್ಯಾನಿಂ ದುಃಖಾಂ ಥೆಂಬೆ ದೆಂವ್ತಾತ್
ಜಿವಿತ್ ತಿಚೆಂ ತಿ ಝರಯ್ತಾ, ದೀಸ್‍ರಾತ್ ಮ್ಹಜೆ ಪಾಸತ್
ತಿಚೆಂ ಮಾಗ್ಣೆಂ ದಿತಾ ಮ್ಹಾಕಾ ಜಿಯೆಂವ್ಚಿ ಸಕತ್
ಆವಯ್ ತಿ ಮ್ಹಜಿ ಮ್ಹಜ್ಯಾ ಸ್ವಪ್ಣಾಂಚಿ ಚಾವಿ
ಜತನ್ ಮ್ಹಜಿ ಕರ್ತಾ ಹರೇಕ್ ಘಡಿ
ತ್ಯಾಗಿ ಜೀವನ್ ತಿಚೆಂ, ಉತ್ರಾನಿಂ ವರ್ಣುಂ ಕಶೆಂ
ಮಾಗ್ತಾಂ ದೆವಾಲಾಗಿಂ ಭಲಯ್ಕೆಭರಿತ್ ಜಿವಿತ್ ತಿಚೆಂ
ದೆವಾ ಬಾಪಾನ್ ದಿಲ್ಲೊ ರಾಕ್ವಣ್ ಭಡ್ವೊ,ತಿ ಮ್ಹಜಿ ಆವಯ್
ಮೊಗಾಕ್ ಆನಿ ತ್ಯಾಗಕ್ ತಿಚ್ಯಾ ಸಲಾಮ್ ಹೆ ಮ್ಹಜೆ
ಫಾರಿಕ್ ಕರುಂಕ್ ಫಾವೊ ನ್ಹಂಯ್ ಹಾಂವ್ ಋಣ್ ತಿಚೆಂ
ಮಾತಿಯೆಂತ್ ಮಾತಿ ಜಾವ್ನ್ ಗೆಲ್ಯಾರಿ ಶರೀರ್ ಹೆಂ ಮ್ಹಜೆಂ
-ಸೀಮಾ ತಾಕೊಡೆ
‘ಸೀಮಾ ತಾಕೊಡೆ' ಮ್ಹಳ್ಳಾ ಲಿಖ್ಣೆಂ ನಾಂವಖಾಲ್ ವ್ಹಳ್ಕೊಚೆಂ ಕು| ಸೀಮಾ ವೀರಾ ಸೆರಾವೊ, ಮೂಡುಬಿದ್ರಿ ವಾರಾಡ್ಯಾಚಾ ತಾಕೊಡೆ ಫಿರ್ಗಜೆಚೆಂ ಏಕ್ ಪ್ರತಿಭಾವಂತ್ ಯುವತಿ. ಆಪ್ಲಿ ಬಿ.ಕಾಂ ಶಿಕಾಪ್ ಶ್ರೀ ಮಹಾವೀರಾ ಕೊಲೆಜ್ ಮೂಡುಬಿದ್ರಿ ಹಾಂಗಸರ್ ಸಂಪೊವ್ನ್, ಪ್ರಸ್ತುತ್ ಮಂಗ್ಳುರ್ಚಾ ಪಿ.ಪಿ.ಕೆ ಎಸೋಸಿಯೇಟ್ಸ್ ಹಾಂಗಸರ್ ಸಿ.ಎ ಆರ್ಟಿಕಲ್‍ಶಿಪ್ ತಿ ಕರ್ನ್ ಆಸಾ. ಏಕ್ ದೆಣ್ಯಾವಂತ್ ಯುವತಿ ತಿ ಜಾವ್ನಾಸೊನ್, ಲೇಖನಾಂ ಆನಿ ಕವನಾಂ ಬರೊಂವ್ಚಿ ವಿಶೇಷ್ ಆಸಕ್ತ್ ತಿಕಾ ಆಸಾ. ಚಿತ್ರಾಕಲಾ ತಿಚಿ ಹವ್ಯಾಸ್ ಜಾವ್ನಾಸಾ.
