News

Jan 31 : ಭಾರತೀಯ್ ಕಥೊಲಿಕ್ ಯುವ ಸಂಚಾಲನ್, ಕಾಸರಗೋಡು ವಾರಾಡೊ ಆನಿಂ ಭಾರತೀಯ್ ಕಥೊಲಿಕ್ ಯುವ ಸಂಚಾಲನ್, ಕೊಲ್ಲಂಗಾನ ಘಟಕಾಚ್ಯಾ ಜೋಡ್ ಆಶ್ರಯ ಖಾಲ್ 2018-19 ವ್ಯಾ ವರ್ಸಚೊ ವಾರಾಡೊ ಕ್ರಿಕೆಟ್ ಪಂದ್ಯಾಟ್ ಸಾಂ. ತೊಮಾಸಾಕ್ ಸಮರ್ಪಿಲ್ಲ್ಯಾ ಕೊಲ್ಲಂಗಾನ ಫಿರ್ಗಜ್ ವಠಾರಾಂತ್ 27-1-2019 ವೆರ್ ಚಲ್ಲೊ.

ಸಕಾಳಿಚೆಂ ಉದ್ಘಾಟನ್ ಕಾರ್ಯೆಂ ಕೊಲ್ಲಂಗಾನ ಘಟಕಾಚ್ಯಾ ಮುಖೆಲ್ಪಣಾಖಾಲ್ ಚಲ್ಲೆಂ. ಉದ್ಘಾಟನ್ ಕಾರ್ಯಕ್ ಕೊಲ್ಲಂಗಾನ ಫಿರ್ಗಜ್ ವಿಗಾರ್ ಮಾ| ಬಾ| ಡೇನಿಯಲ್ ಡಿಸೋಜಾ, ಕೊಲ್ಲಂಗಾನ ಸೈಂಟ್ ತೊಮಾಸ್ ಇಂಗ್ಲಿಷ್ ಮೀಡಿಯಂ ಇಸ್ಕೊಲಾಚಿ ಮುಖೆಲ್ ಮೆಸ್ತ್ರಿಣ್ ಸಿ. ಶಾಂತಿ, ಹೆಲ್ಪ್ ಲೈನಾಚೆಂ ಅಧ್ಯಕ್ಷ್ ಶ್ರೀ. ವಿಲ್ಸನ್, ಆಟ್ಸ್ ಆಂಡ್ ಸ್ಪೋಟ್ಸ್ ಕ್ಲಬ್ ಕೊಲ್ಲಂಗಾನ ಹಾಚೊ ಅಧ್ಯಕ್ಷ್ ಶ್ರೀ. ರಾಜು ಮಾನಾಚೆಂ ವ್ಯಕ್ತಿ ಜಾವ್ನ್ ವೆದಿರ್ ಹಾಜರ್ ಆಸ್ಲೆಂ. ಕೊಲ್ಲಂಗಾನ ಫಿರ್ಗಜ್ ವಿಗಾರ್ ಮಾ| ಬಾ| ಡೇನಿಯಲ್ ಡಿಸೋಜಾ ಹಾಣಿಂ ಪಂದ್ಯಾಟಚೆಂ ಉದ್ಘಾಟನ್ ಕೆಲೆಂ.

ಸಾಂಜೆಚ್ಯಾ ಸಮರೋಪ್ ಕಾರ್ಯಾಕ್ ಮುಖೆಲ್ ಸಯ್ರೆಂ ಜಾವ್ನ್ ವಾರಾಡ್ಯಾಚೆಂ ವಿಗಾರ್ ವಾರ್ ಭೋವ್ ಮಾ| ಬಾ| ಜೋನ್ ವಾಸ್ ಹಾಜರ್ ಆಸ್ಲೆಂ. ವಾರಾಡ್ಯಾಚ್ಯಾ 8 ಘಟಕಾಚೆಂ 15 ಪಂಗ್ಡಾನಿಂ ಪಂದ್ಯಾಟಾಂತ್ ಭಾಗ್ ಘೆತ್ಲೊ. ಪಂದ್ಯಾಟಚ್ಯಾ ಅಕ್ರೇಕ್ ಮಂಜೇಶ್ವರ್ ಘಟಕಾನ್ ಪಯ್ಲೆಂ ಸ್ಥಾನ್ ಆನಿಂ ಮರಿಯಾಶ್ರಮ್ ಘಟಕಾನ್ ದುಸ್ರೆಂ ಸ್ಥಾನ್ ಆಪ್ಣಾಯ್ಲೆಂ.