ತೆ ದೀಸ್....
ಪಾವ್ಸಾಚ್ಯಾ ಕಾಳಾಚೆ ತೆ ದೀಸ್ ಆಜ್ ವಿಸರ್ಲ್ಯಾತ್?
ಪಾವ್ಸಾಂತ್ ಭಿಜ್ಚೆ, ಗಾದ್ಯಾಂತ್ ಕೊಂಗೆ ವಿಂಸ್ಚೆ
ವಾಳಾ ದೆಗೆರ್ ಬಸೊನ್ ಮಸ್ಳ್ಯೆಕ್ ಜಾಳ್ ಘಾಲ್ಲೆ ದೀಸ್
ಯೆತಾಲೆಂವೆ ಪಾಟಿಂ ಹ್ಯಾ ಮೊಡರ್ನ್ ಕಾಳಾರ್?
ಮಾರ್ಗಾ ದೆಗೆರ್ ಆಸ್ಲ್ಯಾ ಉದ್ಕಾಂತ್ ಉಡ್ಚೊ ತೊ ಸಂತೊಸ್
ಝಡಾಂ ಹಾಲೊನ್ ಇಷ್ಟಾಂಕ್ ಭಿಜೊವ್ನ್ ದಾಂವ್ಲಿ ತ್ಯೊ ಘಡ್ಯೊ
ಆಂಬೆ, ಬಿಂಡಾ, ಬೊಂಡೆ, ಮಂಜುಟಿ ವಿಂಚ್ಲೆಲೆ ದೀಸ್
ವಿಸರ್ನ್ ಗೆಲ್ಲ್ಯಾ ತ್ಯಾ ಕಾಳಾಕ್ ವೊಪಿಸ್‍ಮೀಸ್
ನಾ ತೊ ಸಂತೊಸ್ ಆತಾಂ ಹ್ಯಾ ಬದಲ್ಲ್ಯಾ ಕಾಳಾರ್
ವಾಟ್ಸ್ಯಾಪ್, ಕ್ಯಾಂಡಿ ಕ್ರಷ್ ದಿತಾಂ ಆಮ್ಕಾಂ ಸಂತೊಸ್
ತ್ಯಾ ಸಂತೊಸಾಕ್ ಆನಿಂ ಹ್ಯಾ ಸಂತೊಸಾಕ್ ನಾ ತುಲನ್
ತೊ ಕಾಳ್ ಕೆದಾಳಾ ಪಾಟಿಂ ಯೆತೊಲೊ ಕೋಣ್ ಜಾಣಾಂತ್?
- ಜೊಯೆಲ್ ಪಿಂಟೊ, ಬೊಂದೆಲ್
ಕೊಂಕ್ಣಿ ಕಾವ್ಯಾ ಶೆತಾಂತ್ ಸಬಾರ್ ಉದೆವ್ನ್ ಯೆಂವ್ಚೆ ಯುವಕವಿಂ ಪಯ್ಕಿ ಜೊಯೆಲ್ ಪಿಂಟೊ ಎಕ್ಲೊ. ತೊ ಗಾವಾಂತ್ ಬೊಂದೆಲ್ ಫಿರ್ಗಜೆಚೊ. ಪ್ರಸ್ತುತ್ ಸ್ಕೂಲ್ ಆಫ್ ಸೋಶಿಯಲ್ ವರ್ಕ್, ರೋಶನಿ ನಿಲಯಾ ಹಾಂಗಾಸರ್ ಪಯ್ಲೆ ವರ್ಸಾಚೆಂ ಎಮ್.ಎಸ್.ಡಬ್ಲು ಶಿಕಪ್ ತೊ ಜೊಡ್ನ್ ಆಸಾ. ತಾಚಿಂ ಸಬಾರ್ ಲೇಖನಾ ಆನಿ ಕವನಾಂ ಕೊಂಕ್ಣಿ ಪತ್ರಾಂನಿ ಎದೊಳೊಚ್ ಫಾಯ್ಸ್ ಜಾಲ್ಯಾಂತ್.
